دیدار سرپرست وزارت معارف با رئیس کمیته سویدن برای افغانستان

وزارت معارف_کابل: محترمه رنگینه حمیدی، سرپرست وزارت معارف با دانیال مدهانی، رئیس کمیته سویدن برای افغانستان در مقر وزارت معارف دیدار کرد.
دانیال مدهانی، رئیس کمیته سویدن برای افغانستان ضمن حمایت این نهاد از رهبری وزارت معارف به سرپرست وزارت وعده سپرد که کمیته سویدن برای افغانستان به تعهداتش در خصوص ارائه خدمات آموزشی محلی، ارتقای ظرفیت معلمین و دیگر بخش‌ها متعهد بوده و در این زمینه و نیز دیگر بخش‌ها با وزارت معارف به عنوان یک همکاری قوی کارخواهد کرد.
 سرپرست وزارت معارف، از حضور رئیس کمیته سویدن برای افغانستان و همکاری‌های این نهاد با وزارت معارف سپاسگزاری نموده، گفت که هدف اساسی وزارت معارف دسترسی همگانی مردم به تعلیم و تربیه است و دیدگاه مشخص، برنامه‌ی جامع و اراده مستحکم نیز در این زمینه وجود دارد و بدون شک همکاری کمیته سویدن در آن موثر است.