د پکتیا له پوهنې ریاست څخه خبرونه
د پکتیا ولایت په ځدراڼ ولسوالۍ کې د کلیت العلوم له مدرسې څخه ۱۷ تنه او څو تنه کسان د نورالاسلام له مدرسې څخه فارغ او د یو لړ شاندارو مراسمو په ترڅ کې د فراغت سندونه ورکړل شول. ويناوالو دوی ته د فراغت مبارکي وويله او همدارنګه د حافظانو په مقام او د قرآن کریم د پوهې پر ارزښت یې ویناوې وکړې.
پاملرنې موسسې د یونیسف ادارې په مالي مرسته د پکتیا ولایت د څمکنيو ولسوالۍ په بېلابېلو سیمو کې د ښوونې او روزنې څو سیمه ییز او ګړندي ټولګي جوړ کړي چې د دغه ولایت د پوهنې ریاست تر څارنې لاندې به فعالیت کوي.
د څمکنيو ولسوالۍ د نرګوسي ښوونځي له کاره لویدلي ميزونه او څوکۍ د دغه ښوونځي د پرسونل په مالي لګښت ترميم او ګټې اخيستنې ته وسپارل شوې.
د احمدخېلو ولسوالۍ د پوهنې آمریت مسوولین وايي: د دې ولسوالۍ د حسن خېل کلي د خلکو په مرسته یې د یوې دیني مدرسې د بنسټ ډبره کېښوده او همدارنګه د دې ولسوالۍ له څو ښوونځیو څخه یې هم څارنه وکړه.
په دې وروستیو کې به د پکتیا ولایت په مرکز او ولسوالیو کې د یونیسف د سیمه ییز دفتر په مالي مرسته د ADA ادارې لخوا د سیمه ییزو او چټکو زده کړو ۱۵۰ ټولګي فعال شي. چې په همدې موخه د ياد ولايت د پوهنې رياست د مشرتابه او د يادو ادارو د استازو په ګډون یوه غونډه جوړه شوه او په دې باب يې خبرې اترې وکړې.
