له ولایتونو څخه د پوهنې د فعالیتونو لنډ خبرونه
- سمنګان:
د سمنګانو د پوهنې ریاست د اسلامي زده کړو آمر مولوي شمس الله شیخ زاده د پوهنې د څارنې له ټیم سره یو ځای د سمنګان د یتیم خونو له درسي څانګو څخه څارنه وکړه او د چارو د لا ښه والي په موخه یې اړوندو مسوولینو ته لازمې لارښوونې وکړې.
- همدارنګه:
د سمنګان ولایت د فېروز نخچیر د پوهنې آمر سید صدرالدین هاشمي له خپلو کارکوونکو سره د همغږۍ غونډه وکړه او د کلنیو ازموینو پر مسلې، د دندو پر لاروچارو او د شرعي احکامو پر تطبیق یې ټینګار وکړ.
- پکتیکا:
د پکتیکا ولایت د پوهنې ریاست سکتوري غونډه د پوهنې، اطلاعاتو او کلتور، ملي راډیو تلویزیون او د دغه ولایت د تخنیکي او مسلکي چارو ریاستونو د مسوولینو په ګډون جوړه شوه. د غونډې ګډونوالو په لاسته راوړنو، راتلونکو پلانونو او شته ننګونو خبرې وکړې او ټولو وعده وکړه، چې له پوهنې ریاست سره به تر خپله وسه مرستې کوي.
- بادغیس
د بادغیس ولایت د پوهنې رئیس مولوي محب الله احسان د یوه پلاوي په ملتیا د حنظله بادغیسي، نسوان او نريمان قلعه نو خصوصي لېسو له کلنیو ازموینو څخه څارنه وکړه او د دغو ښوونځیو مسوولینو ته یې سپارښتنه وکړه، چې له شفافیت څخه به کار اخلي.
- کاپیسا:
د کاپيسا ولايت د ښووني او روزني رياست مرستيال استاد خان آغا هارون د يوه کاري سفر په ترڅ کې د غازي مير مسجدي خان، اشتر ګرام او د بي بي صفورا نجونو لیسې او همدارنګه د ایزديار شهيد منځني ښوونځي له اداري او تدريسي چارو څخه ليدنه وکړه. د يادو ښوونځيو مسوولينو ته يې د تدريسي چارو د لا ښه والي په اړه لازمې لارښوونې وکړې.
- جوزجان:
د جوزجان ولايت د مرديان ولسوالۍ د پوهنې آمر ملا عبدالستار ايوب د دې ولسوالۍ د پوهنې له مسوولينو سره د يوې غونډې په ترڅ کې د کلنيو ازموينو په عادلانه ډول د ترسره کېدو په اړه خبرې وکړې او هغوى ته يې لارښوونه وکړه، چې د ازموینو په جریان کې دې شفافیت او عدالت په پام کې ونیسي.
