په میدان وردګ ولایت کې د یوه ښوونځي نوې ودانۍ پرانیستل شوه
د میدان وردګ ولایت جغتو ولسوالۍ کې د بیدمشک لومړني ښوونځي نوې ودانۍ، د یاد ولایت پوهنې رئیس مولوي محمد عثمان حریت لخوا په داسې حال کې په رسمي ډول پرانیستل شوه، چې د نوموړې ښوونځي مسئولینو، ښوونکو، یو شمېر علماوو، او د خلکو استازو هم حضور درلود.
یاد لومړنی ښوونځی د ۵۵زره امریکایي ډالرو لګښت سره په یو جرېب ځمکه کې په پاخه او اساسي ډول رغول شوی، چې ځمکه او ټول لګښت یې د همدې ولسوالۍ د یوه علم پال ځوان له لوري ورکړل شوی دی.
د بید مشک لومړني ښوونځي نوې ودانۍ پر ۱۰ درسي ټولګيو سربېره نورې آسانتیاوې او اړین ملحقات هم لري.
د میدان وردګ ولایت پوهنې رئیس د یاد ښوونځي د پرانېستې پر مهال، د خپلو هېوادوالو له احساساتو مننه وکړه او له نورو یې وغوښتل، تر څو د هېواد د پوهنیز نظام په وده او پیاوړتیا کې خپله ملي او اسلامي ونډه ولوبوي.
غونډه د دعائیې په لوستلو سره پای ته ورسېده.
