په غزني ولایت کې د پوهنې لپاره (۶۹) جرېبه ځمکه وقف شوه
د غزني ولايت پوهنې رئيس الحاج مولوي مير نصير احمد حسيني څرګنده کړه، چې د ١٤٠٣ لمریز کال له پيل څخه تر اوسه پورې په ټوليزه توګه د غزني ولایت د علم پروره اوسېدونکو له خوا په دغه ولایت کې د مدارسو او ښوونځیو جوړولو په موخه، ۶۹ جرېبه ځمکه پوهنې وزارت ته وقف شوې ده.
نوموړي زیاته کړه، چې د روان لمریز کال پر مهال په دغه ولايت کې د يو شمېر مدارسو او ښوونځيو د ودانیو رغونې او بيارغونې چارې روانې دي، چې لګښت يې د یاد ولايت د خلکو له خوا ورکړل شوى او اندازه يې ٤٥ مېليونه افغانۍ ده.
د پوهنې وزارت مشرتابه د پوهنې په برخه کې د هېواد علمي شخصیتونو په ځانګړې توګه د غزني ولایت علم پروره اوسېدونکو له هغو مرستو هرکلی کوي، چې د هېواد ښوونیز نظام د لا پیاوړتیا او پرمختګ په موخه یې ترسره کوي.
