په بلخ ولایت کې د یو باب لېسې احاطوي دېوال جوړ شو
د بلخ ولایت په مرکز مزارشريف ښار کې د استاد وجدان کورنۍ له لوري د ۲۹۰ زره افغانيو په لګښت، (د استاد وجدان لېسې) احاطوي دېوال ورغول شو.
د یاد احاطوي دېوال د پرانیستې په مراسمو کې د پوهنې رئیس الحاج مولوي عبدالجلیل شهید خېل، علماء کرامو او قومي مخورو ګډون درلود.
د بلخ ولايت پوهنې رئیس د ښوونیزو بنسټونو د جوړولو اهمیت په باب د خبرو پرمهال، له ملي سوداګرو وغوښتل، چې د پوهنيزو بنسټونو په رغونه او بيارغونه کې پوهنې ریاست سره همکاري وکړي.
د غونډې په دوام یو شمېر ګډون والو د سالمې ټولنې په رامنځته کېدو کې د علم او پوهې د رول په اړه خبرې وکړې او له پوهنیز نظام څخه یې خپل ملاتړ څرګند کړ.
د پوهنې وزارت مشرتابه هم پوهنیز نظام سره د علم پروره خلکو له مرستو په ځانګړې توګه د استاد وجدان د کورنۍ له همکارۍ او ملاتړ څخه قدرداني کوي.
