پروان ولایت کې د یوې دیني مدرسې بنسټ ډبره کېښودل شوه
د پروان ولایت مرکز چاریکار ښار په دولانه کلي کې د ۴۰ زره ۲۵۳ امریکایي ډالرو په لګښت د یوې نوې دیني مدرسې بنسټ ډبره، پوهنې رئیس، مسئولینو او د سیمه ییزو ادارو د یو شمېر نورو چارواکو او د خلکو استازو په حضور کې کېښودل شوه.
لومړی د پروان ولایت پوهنې مسئولینو په ټولنه کې د علم او پوهې د اهمیت په اړه خبرې وکړې او د پوهنې وزارت د پراختیایي پروګرامونو په اړه یې معلومات ارایه کړل.
ورپسې د پروان ولایت د اقتصاد رئیس محترم حافظ مجیب الله رحیمي د ځوانانو د تعلیم او روزنې د رول په اړه د خبرو ترڅنګ، د ښوونیزو او روزنیزو ادارو له چارواکو وغوښتل چې زدهکوونکي په اسلامي او ملي روحیې سره وروزي.
د چارواکو په وینا: دغه مدرسه د پوهنې سره د یوې همکارې ادارې په مالي ملاتړ له ټولو اړینو ملحقاتو سره په پاخه او اساسي بڼه جوړېږي؛ چې له یو کال څخه په کم وخت کې به ګټې اخیستنې ته وسپارل شي.
