د کابل ولايت د تغر سفلی ښوونځي د لېږد په تړاو مشورتي غونډه ترسره شوه
د کابل ولایت په خاک جبار ولسوالۍ کې د یو چینایي شرکت له لوري د عینک د مسو د دویم کان د کار له پیل سره سم، په یاد ځای کې د تغرسفلې د ښوونځي موقعیت د دې کان کیندنې د پلي کېدو مخه نیولې.
له همدې امله، پورتني قراردادي شرکت د پوهنې وزارت څخه غوښتنه کړې، چې یاد ښوونځی دې په مشروط ډول د یاد شرکت له لوري بل ځای ته ولېږدوي.
په همدې موخه نن د پوهنې وزارت د سرچینو او ادارې د معین مولوي صبغت الله وصیل په مشرۍ مشورتي غونډه ترسره شوه، چې پکې د یاد وزارت د ملکیتونو د ساتنې او ودانیو د ترمیم، د لومړنیو او ثانوي زده کړو، څارنې او ارزونې ریاست مسئولینو او د یو شمېر نورو اړوندو ادارو استازو ګډون درلود.
په دې غونډه کې د يادې ادارې مسئولينو د شرکت له استازو سره د ښوونځي د لېږدونې د څرنګوالي او د هغو دويم ځاى ته د لېږدولو په اړه خبرې وکړې او هوکړې ته ورسېدل.
د غونډې ګډون والو هوکړه وکړه، چې په لومړي ګام کې دې د ښوونځي د ترمیم ځای (ځمکه) د یوې کمېټې له خوا وڅېړل شي او بیا دې دغه موضوع په رسمي ډول د پوهنې وزارت مشرتابه ته وړاندې او لازم اقدامات به ترسره شي.
