د پوهنې وزارت مشرتابه له لوري د یاد وزارت د کیفیت تضمین معین او د څېړنو رئیس وستایل شول
تېره اوونۍ د پوهنې وزارت د کیفیت تضمین معینیت او د څېړنو ریاست له لوري "د افغانستان د ښوونیزو او لوړو زده کړو بنسټونو د پیاوړتیا ملي کنفراس" ته ۱۴ علمي مقالې وړاندې شوې؛ چې تر ارزونې وروسته ۳ مقالو لومړی او پاتې ۱۱ مقالو ته دویم مقام ورکړل شو.
دغه راز د پوهنې وزارت هغه علمي څېړنې کوم چې د معیاري زده کړو د رامنځته کولو او د افغانستان د ښوونیز نظام د پیاوړتیا په برخه کې یې ترسره کړې، د لوړو زده کړو وزارت د پوهانو او استادانو له خوا وستایل شوې او د هېواد د علمي او اکاډمیکې ټولنې په منځ کې یې درېیم مقام خپل کړ.
په همدې مناسبت نن د پوهنې وزارت د کیفیت تضمین معین الحاج مولوي عبدالخالق صادق او د څېړنو رئیس ډاکټر محمد عمر دوران زی د پوهنې وزارت د سرپرست الحاج مولوي حبیب الله آغا له لوري په ستاینلیکونو وویاړل شول.
ورپسې د پوهنې وزارت د کیفیت تضمین معین د یاد وزارت د مشرتابه او په ځانګړې توګه د دغه وزارت د سرپرست له پاملرنې او ستاینې څخه د مننې په ترڅ کې خپله ژمنه تازه کړه او ویې ویل: دوی چمتو دي له خپلې مسلکي پوهې او کاري تجربې څخه په ګټه اخیستلو سره د هېواد د ښوونیز نظام د پیاوړتیا په لار کې خپلې هلې ځلې لاپسې زیاتې کړي.
دا په داسې حال کې ده، چې د ياد علمي کنفرانس په پاى کې د لوړو زده کړو وزارت او د ښوونې او روزنې پوهنتون له لوري د پوهنې وزارت سرپرست ته افتخاري نښان او ستاینلیک ډالۍ شوي وو.
