د پوهنې وزارت د اسلامي زده کړو معینیت پلاوي، بادغیس ولایت ته سفر وکړ
د پوهنې وزارت د احصایې آمر او د یاد وزارت د اسلامي زده کړو معینیت د خصوصي دارالعلومونو ریاست سرپرست مولوي عبدالغني په مشرۍ یو پلاوي، د مدارسو لپاره د نویو بستونو تطبیق او لارښوونې په موخه بادغیس ولایت ته سفر وکړ.
یاد پلاوي د بادغیس ولایت پوهنې له رئیس او مسئولینو سره په کتنه کې، د خپل سفر موخې، د نوي تشکیلاتي جوړښت د کړنلارې تطبیق ، د اسلامي زده کړو له بنسټونو څخه څارنه، د مرکز او ولسوالیو د پوهنې آمرینو او عمومي مدېرانو لپاره د سیمینارونو جوړول یاد کړل.
پلاوي د خپل سفر په ترڅ کې، د حضرت بلال (رض)، حضرت خالد بن ولید (رض)، حضرت حمزه (رض) او نصرتیه مدارسو مسئولینو سره په کتنو کې د یادو مدارسو ستونزې وارزولي او د حل په موخه یې د همکارۍ ژمنه وکړه.
د يادونې وړ ده، چې ياد پلاوي د پروګرام له مخې، د پوهنې رياست د رئیس، آمرینو او مدېرانو لپاره د همدې رياست د کنفرانسونو په تالار کې يو ورځنى سيمينار هم جوړ کړ او په دې برخه کې يې د اړتيا وړ موضوعاتو لکه، د نوي تشکیلاتي پروسې د تطبیق بهیر او په یاده پروسه کې د وړتیا او تجربې له مخې د نوماندانو ګمارلو په تړاو خبرې وکړې.
په دې وروستیو کې د بادغیس ولایت پوهنې رئیس مولوي محب الله احسان، د یاد پلاوي له شتون څخه د خوښۍ په څرګندولو سره ژمنه وکړه چې د پلانونو په تطبیق او د یاد ولایت دیني مرکزونو ته د نویو بستونو دعادلانه وېش په برخه کې به جدي او هر اړخیزه همکاري وکړي.
