د هېواد په سړو ولايتونو کې د مدارسو او ښوونځيو څلور نيم مياشتنۍ آزموينې پيل شوې
د پوهنې وزارت د لایحې له مخې، د هېواد په زیاتو سړو او سړو ولایتونو کې، د مدارسو او ښوونځیو څلور نیم میاشتنۍ آزموینې، نن (د چنګاښ په ۱۶ مه نېټه) پیل شوې.
په مرکز او اړوندو ولایتونو کې د پوهنې ریاستونو د څارنې ټېمونو سربېره د یادو څانګو رئیسانو او مشرتابه، د آزموینې له بهیر څخه څارنه وکړه او په خپلو خبرو کې یې د آزموینې د نظم او ډسپلین په رعایتولو ټینګار وکړ.
دپوهنې مسئولینو زده کوونکو ته په خطاب کې وویل: ولس او هېواد له تاسو ځوانانو څخه د قدر وړ او صادقانه خدمت تمه لري او اړینه ده، چې دغې سپېڅلې موخې ته د رسېدو لپاره شپه او ورځ هڅې وکړئ؛ تر څو په راتلونکي کې خپل ځانونه د نړۍ د علمي او تخنیکي لاسته راوړنو سره برابر او استوار کړئ.
په پام کې ده، چې په يادو ولايتونو کې څلور نيم مياشتنۍ آزموينې د چنګاښ مياشتې تر پايه دوام ولري.
