د میدان وردګ ولایت د ښوونځيو ممتاز زده كوونكي وستايل شول
د ميدان وردگ ولايت د ښوونځیو د ممتازو زده کوونکو د هڅونې په موخه لويه ستاينغونډه ترسره شوه.
په ياده غونډه کې د ميدان وردګ پوهنې رئيس مولوي محمد عثمان حريت، د ولايت مرستيال مولوي سيدالرحمن حافظ، د سيمه ييزو ادارو يو شمېر ملکي او نظامي مسٸولينو او علماوو ګډون کړى و.
په پىل کې د یاد ولایت د پوهنې رئیس مېلمنو ته د ښه راغلاست او د عالي لېسو زده کوونکو ته د مبارکۍ ویلو په ترڅ کې څرګنده کړه چې د يادې غونډې د ترسره کولو څخه یې اساسي موخه، د ښوونځیو د ممتازو زده کوونکو هڅونه وه، تر څو نور زده کوونکي هم د خپلو زده کړو په برخه كې خپلې هڅې لاپسې ګړندۍ کړي.
همدارنګه نوموړي په دې برخه کې د استادانو د هلو ځلو د ستاینې ترڅنګ زده كوونكو ته په خطاب کې وویل: د ویاړ ځای دی چې په ټول هېواد کې د سولې په تامین سره تاسو ته د دیني او عصري علومو د تدریس زمینه برابره شوې ده او له دې طلايي فرصت څخه بايد غوره ګټه پورته کړٸ.
دغه راز نورو مسٸولینو هم په خپلو خبرو کې د هېواد د ماشومانو د سالمې روزنې په برخه کې د یاد ولایت د پوهنې ریاست له پاملرنې مننه وکړه.
