د لوګر د دوو نمونوي ښوونځیو آمران د غوره کړنو له امله وستایل شول
پوهنې وزارت_لوګر: د لوګر ولایت د دوو نمونوي ښوونځیو آمران د ولسمشر په لارښوونه د غوره کړنو د ترسره کولو له امله په ستاینلیکونو وستایل شول.
د نوموړو آمرانو د ستایلو په غونډه کې والي الحاج محمد انور اسحاق زي، د ولایتي شورا رئیس حسیب الله ستانکزي،د پوهنې رئیس عبدالوکیل کلیوال، د پوهنتون رئیس پوهنمل عبدالناصر ستانکزی،امنیتي چارواکو، د ځوانانو دفتر استازی روز الدین میوند، یو شمېر قومي مشرانو، ښوونکو او زده کوونکو برخه اخیستې وه.
په ستایل شویو کې د حضرت عمر فاروق(رض) د هلکانو لېسې آمر لطف الله ستانکزی او د بي بي آمنې د نجونو لېسې آمره نفیسه بها شامل دي.
افغان ولسمشر محمد اشرف غني د نوموړو ښوونځیو آمران د نمونوي ښوونځیو د پېژندل کېدو او دغه راز د غوره کړنو د ترسره کولو له امله په ستاینلیکونو او بخششي معاشونو ستایلي.
د لوګر د پوهنې رئیس عبدالوکیل کلیوال د نوموړو آمرانو د ستاینې په مراسمو کې وویل، د غوره کړنو له کبله چې تاسو کړي زه پر تاسو ویاړم.
د پوهنې رئیس ژمنه وکړه، چې په راتلونکې کې به د ښوونکو د ستاینې لړۍ جاري ساتي او د نورو ښوونځیو آمران او ښوونکي به هم وستایي.
ها خوا د لوګر والي الحاج محمد انور اسحاق په خپلو خبرو کې د ولسمشر له خوا د ښوونځیو د آمرانو د هڅونې او ستاینې لړۍ وستایه.
والي یادې غونډې ته د خپلې وینا پر مهال پر ټولو ښوونکو غږوکړ، چې په ټولنه کې د تعلیم او تربیه د ودې لپاره جدي کار وکړي.
له بل لوري د لوګر د ولایتي شورا رئیس حسیب الله ستانکزي په خپلو خبرو کې د ولسمشر له خوا دغه پیل شوی حرکت ګتور وباله او په خبره یې له دې سره به نور ښوونکي هم وهڅول شي.
د غونډې په پای کې د حضرت عمر فاروق(رض) د هلکانو لېسې د ترانې ټیم زده کوونکو د هېواد او د ستایل شویو آمرانو په ویاړ د هېواد ترانه وویله، چې د والي له خوا په نغدي جایزو ونازول شول.
د یادونې وړده، د لوګر د ښوونځیو یو شمېر آمران، سرښوونکي او ښوونکي له دې مخکې هم د ولسمشر له خوا په عالي دولتي مډالونو او امتیازي تقدیرنامو ستایل شوي دي.
