د اقرأ پروژې په اړه په افغانستان كې د نړيوال بانګ WB له استازو سره د پوهنې وزير ليدنه
په دغه غونډه كې چې د اقرأ پروژې د پليكيدو په اړه د پوهنې وزارت په مقر كې ترسره شوه په افغانستان كې د نړيوال بانګ استازو خپل وروستي راپورونه د يادې پروژې د تطبيق په اړه د پوهنې وزير ښاغلي ډاكټر محمد ميرويس بلخي ته وړاندې كړل.
د پوهنې وزير په نوموړې پروژه كې د نړيوال بانګ له ملاتړ څخه مننه وكړه او له دواړو لوريو څخه يې وغوښتل ترڅو د افغانستان د ښوونې او روزنې په برخه كې د اقرأ پروژې د تكميل او بشپړيدو په اړه په ګډه كار وكړي.
د پوهنې وزارت رهبرۍ د دې وزارت د نويو برنامو لكه د Functional review، د پوهنې وزارت د كاركوونكو د بايومتريك، په هيواد كې د متوازنو زده كړو په برخه كې د ښوونيزو چارو د پراختيا لپاره د ولاياتو د پوهنې رياستونو د صلاحيتونو د لوړولو په برخه كې د نړيوال بانګ له لوري د ملاتړ غوښتنه وكړه.
په افغانستان كې د نړيوال بانګ استازي كريستن اندو د پوهنې د پرمختګ په برخه كې د پوهنې وزارت هڅې وستايلې او په افغانستان كې يې د اقرأ پروژې اوسنى حالت تشريح كړ.
د يادونې وړ ده، چې په ياده ليدنه كې د پخوانيو پروژو په اړه، چې د دواړو لوريو لخوا تر كار لاندې وې هم خبرې وشوې.
