د پوهنې وزارت سرپرستې د هلمند له والي سره وکتل
د پوهنې وزارت، کابل: د پوهنې وزارت سرپرستې آغلې رنګینې حمیدي، د پوهنې په وزارت کې د هلمند ولایت والي ښاغلې تورن جنرال یاسین خان سره وکتل.
په دې غونډه کې، د هلمند والي په یاد ولایت کې د پوهنې پرمختګ او ستونزو په ځانګړي ډول د درسي کتابونو نشتون، د ښوونځیو جوړول، د ښوونکو کمبود او یو شمیر نورو مسایلو په اړه خبرې وکړې.
د پوهنې وزارت سرپرستې په دغه ولایت کې د پوهنې په برخه کې د اصلاحاتو او پرمختګ په اړه د هلمند ولایت د والي د هڅو څخه مننه وکړه او وویل: د پوهنې وزارت په محرومو سیمو کې د پوهنې د ننګونو حلولو ته ځانګړې پاملرنه لري.
آغلې رنګینې حمیدي زیاته کړه چې د پوهنې وزارت هڅه کوي د ټولو لپاره په ځانګړي توګه د نجونو لپاره د غوره ښوونې او روزنې زمینه برابره کړي.
