کابل بګرامیو ولسوالې کې د محلي زده کړو د بنسټ ډبره کیښودل شوه
د کابل ولایت د بګرامیو ولسوالې اړوند د محلي زده کړو (CLC) مرکز د بنسټ ډبره د کابل ولایت د پوهنې رییس سید عزیز احمد هاشمي، د پوهنې وزارت د لیک لوست زده کړو رییس الله باز جم، په افغانستان کې د جاپان هېواد د یونسکو د ملی فدراسیون مسوول یما فیروزی او د سیمې قومي مشرانو په کډون کیښودل شوه.
د یاد مرکز ودانۍ د۳۰۰ متر مربع ځمکي په ساحه کې چې دسېمي د خلکو لخوا پوهنې وزارت ته ډالۍ شوي په پاخه او اساسي ډول په دوو پوړنو کې ، د جاپان هېواد د یونسکو د ملی فدراسیون په مالی لکښت د ۵۰ زرو امریکایی ډالرو په ارزښت د پوهنې وزارت د تعمیراتو ریاست په همکاري جوړیږي.چې ۴ خونې، دغونډو تالار، احاطوي دېوال، د ابو څښلو څاه، عصري تشنابونه او نورې اړوندې ټولې اسانتیاوې به ولري.
ددې ودانۍ له جوړېدو سره د سیمې شاوخوا ۱۰۰ تنو نا لوستو میرمنو ته د لیک لوست، خیاطي، ګل دوزي قالین، بافی اونورو حرفوی زده کړو خوندي چاپېریال برابرېږي.
