د کونړ ولایت په پوهنې ریاست کې "د اداري پروسو ساده کولو " په اړه ورکشاپ ترسره شو
د اداري پروسو ساده کولو د پلانونو د تشرېح کولو او د پوهنې کارکوونکو ته د نويو اداري مېتودونو سره د بلدتیا لپاره، "د اداري پروسو ساده کولو " په نوم یو ورځنی ورکشاپ، د کونړ ولایت پوهنې رئیس محترم مولوي محب الله حیدري، د چارو اداري لوی ریاست د اداري اصلاحاتو او ملکي خدمتونو د ساده کولو مرستیال مفتي محمد فرید غزنوي او د پوهنې کارکوونکو په حضور کې ترسره شو.
لومړی د یاد ولایت پوهنې رئیس ګډونوالو د ښه راغلاست پرمهال وویل چې د اداري چارو ساده کول د دندو د ښه والي او خلکو ته د خدمتونو د ګړندي کولو لپاره یو له اساسي اړتیاوو څخه دي او زیاته یې کړه چې د دې پروسې پلي کول کولی شي د اداري کارونو پېچلتیا کمولو، روڼتیا زیاتولو او د پوهنې خدمتونو وړاندې کولو په برخه کې د پام وړ پرمختګونه رامنځته کړي.
ورپسې د اداري اصلاحاتو او ملکي خدمتونو ساده کولو مرستیال هم د دې پروسې د اهمیت او اهدافو په اړه هر اړخیز معلومات وړاندې او د ګډونوال رول یې د هغو په بریالیتوب کې حیاتي وباله.
