د بامیان ولایت په دوو ولسوالیو کې د ښوونکو لپاره روزنیز ورکشاپ جوړ شو
د بامیان ولایت پوهنې ریاست له لوري په یکاولنګ او یکاولنګ دوم ولسوالیو کې د تقویتي درسي ټولګیو د ۲۶۰ تنو ښوونکو لپاره د پنځه ورځني مېتودیکي روزنیز ورکشاپ لړۍ پیل شوه.
دغه روزنیز پروګرام په یادو ولسوالیو کې د ولسوالۍ مرستیال، پوهنې آمر او د یو شمېر ګډون والو په حضور کې په رسمي ډول پرانیستل شو.
د ياد ورکشاپ منځپانګه چې د ښوونکو د پوهاوي کچې لوړولو او د هغوی د وړتیاوو پیاوړتیا په موخه طرحه شوې، پر مهمو موضوعاتو لکه د ماشومانو حقوق، د ژوند مهارتونه، رواني، عاطفي او ټولنیز چلندونو تمرکز لري.
