د سمنګان ولایت پوهنې ریاست له ۱۷۰ تنو م.جاهدینو څخه د تعلیمي سویې د تثبیت ازموینه واخیسته
د سمنګان ولایت پوهنې ریاست د هېواد د اولادونو لپاره د زدهکړو اسانتیاوو برابرولو په موخه، له شاوخوا ۱۷۰ تنو م.جاهدینو څخه چې د زدهکړو له دوام څخه پاتې شوي وو، د تعلیمي سویې د تثبیت ازموینه واخیسته.
د مسئولینو په وینا؛ دغه داوطلبان په ج.هادي فعالیتونو کې د خپلو مصروفیتونو له امله د زدهکړو له بهیر څخه پاتې شوي وو؛ خو اوس چې تعلیمي فرصتونه برابر شوي، کولای شي خپلې زدهکړې بیا پیل او دوام ورکړي.
هغوی زیاته کړه چې، ټاکل شوې ده د دغې پروسې ګډونوال د خپلې تعلیمي کچې له مخې د ښوونځیو له اووم څخه تر دولسم ټولګي پورې شامل شي.
تر دې وړاندې هم یاد ریاست له سلګونو م.جاهدینو او هغو کډوالو څخه چې بېرته هېواد ته راستانه شوي دي، د تعلیمي سویې د تثبیت ازموینه اخیستې او هغوی یې د خپلې تعلیمي کچې له مخې د زدهکړو د دوام لپاره اړوندو ښوونځیو ته ورپېژندلي دي.
