د پوهنې وزارت محترم ستر سلاکار بدخشان ولایت ته په رسمي سفر لاړ
د پوهنې وزارت ستر سلاکار محترم سید غیاث الدین آغا په یو کاري سفر بدخشان ولایت ته ورسېد او د یاد ولایت له پوهنې رئیس محترم الحاج مولوي محمد طاهر جواد، د مرکز او ولسوالیو د ښوونځيو له آمرینو او کتابتونونو له مدیرانو سره یې وکتل او د کتابتونونو د وضعیت، د موجوده کتابونو د محتوا او د پوهنې وزارت د پالیسیو پلي کولو په اړه یې بحث او نظرونه تبادله کړل.
په دې غونډه کې، د پوهنې رئیس د یاد پلاوي د هرکلي په ترڅ کې زیاته کړه چې د پوهنې وزارت د لوړ پوړي سلاکار سفر د همدغه ولایت د ښوونځیو د کتابتونونو د ارزونې لپاره ترسره شوی او ټول اړوند چارواکي مکلف دي، چې په دې برخه کې اړینې همکارۍ وکړي.
ورپسې د پوهنې وزارت محترم سلاکار د کتابونو او تعلیمي سرچینو په نږدې څارنې ټینګار وکړ او ویې ویل چې تعلیم د ځوان نسل د سالمې او اسلامي زدهکړې لپاره دروند مسئولیت لري.
دغه راز نوموړي د یو شمېر ښوونځیو کتابتونونو څخه هم لیدنه وکړه او اړوندو چارواکو ته یې د مناسبو کتابونو د تنظیم، ساتنې او ټاکنې په اړه اړینې لارښوونې او سپارښتنې وکړې.
