د پوهنې وزارت د سواد زدهکړې ریاست او د زندانونو چارو د سمون ادارې ترمنځ د ګډو همکاریو هوکړهلیک په تړاو غونډه جوړه شوه
په هغو مراسمو کې چې د پوهنې وزارت د سواد زدهکړې ریاست او د زندانونو چارو د سمون ادارې ترمنځ د بې سوادۍ له منځه وړلو او د زندانیانو لپاره د سواد زدهکړې کورسونو جوړولو په موخه د ګډو همکاریو هوکړهلیک لاسلیکېدو په مناسبت جوړ شوي وو، پکې د پوهنې وزارت د سواد زدهکړې رئیس محترم الحاج مولوي عبیدالله آخندزاده، مسئولینو او د زندانونو چارو د سمون ادارې لوی رئیس محترم حافظ مولوي نظر محمد ناصري ګډون درلود.
په پیل کې د سواد زده کړې چارواکو مېلمنو ته ښه راغلاست ووایه او د پلانونو، پروګرامونو، د زندانیانو لپاره د لازمو تعلیمي فرصتونو برابرولو او د سواد زده کړې ریاست یو شمېر نورو فعالیتونو په اړه یې هر اړخیز معلومات ارایه کړل.
ورپسې د زندانونو چارو د سمون ادارې رئیس، د یاد هوکړهلیک له لاسلېکدو څخه خوښي څرګنده او زیاته یې کړه چې پلان لري تر څو د هېواد په زندانونو کې د ټولو بندیانو لپاره د سواد زدهکړې کورسونه جوړ او د پوهنې وزارت د سواد زدهکړې نصاب به په پورته ذکر شويو کورسونو کې تدریس کړي.
همدارنګه نوموړي وویل چې د زندانونو چارو د سمون ادارې سره په همغږۍ به د روزنیز کورسونو تر بشپړېدو وروسته، د یادو کورسونو فارغانو ته، د پوهنې وزارت د سواد زدهکړې ریاست له لوري تر اروزنې وروسته سندونه او تصدیقپاڼې ورکول کېږي.
دغه راز د زندانونو چارو د سمون ادارې رئیس ډاډ ورکړ چې د دوی اړوند اداره، بندیانو ته د اسلامي روحیې پر بنسټ د زدهکړې لپاره ژمنه ده، تر څو په راتلونکي کې زندانیان په خپلو تېرو کړنو پښېمانه او په راتلونکي کې د خپلو خلکو او هېواد لپاره د ګټورو خدماتو سرچینه شي.
یاد پرتمین مراسم د پوهنې وزارت د سواد زدهکړې د رئیس محترم الحاج مولوي عبیدالله آخندزاده له خوا دعائیې په لوستلو سره پای ته ورسېدل.
