د برك ( BRAC ) موسسه له پوهنې وزارت سره په ګډې همكارۍ ۳۰ زره تنه ماشومان په ښوونځيو كې شاملوي
د پوهنې وزارت – كابل: په ښوونځيو كې د ۳۰ زرو تنو ماشومانو شاملول او هغوى ته د ښوونيځو آسانتياوو برابرول د پوهنې وزير ښاغلي ډاكټر محمد ميرويس بلخي او د برك نړيوالې موسسې رئيس محمد صديق علي ترمنځ د خبرو اترو اصلي ټكي وو.
په دغه غونډه كې چې د پوهنې وزارت په مقر كې ترسره شوه د برك نړيوالې موسسې چمتو والى وښود چې په ټول افغانستان كې به په ۱۰۰۰ ښوونځيو كې ۳۰ زره ماشومان شاملوي او دوى ته به تعليمي آسانتياوې برابروي.
د پوهنې وزير ښاغلي ډاكټر محمد ميرويس بلخي وويل: په هيواد كې د بيلابيلو دلايلو له وجې لكه: فقر، ناامني او ناولي دودونه د دې سبب شوي ترڅو ۳،۷ ميليونه ماشومان په خاصه توګه نجونې د ښوونې او روزنې له نعمت څخه محرومې شي.
په نوموړې غونډه كې د برك موسسې مشر ښاغلي محمد صديق علي پوهنې وزارت كې د اصلاحاتو راوستل يو مثبت ګام وباله او دغه ليدنه يې د پوهنې وزارت او د برك موسسې ترمنځ د ښوونې او روزنې په برخه كې د افغان ماشومانو په ګټه او د ګډو همګاريو د پيل يوه برخه ياده كړه.
