خوست کې د ۱۲ ښوونځیو لپاره د ودانیو د بنسټ ډبره کېښودل شوه او تر څنګ د ۶ ښوونځیو لپاره د محلقاتو د جوړولو کار پیل شو
په همدې مناسبت نن ورځ د دوه منده شمل ولسوالۍ اړوند د سورکاڼي کلي په ابتدائیه ښوونځي کې مراسم جوړ شوي ؤ.
په پیل کې د کلیو پراختیا رئیس عاشق الله اخلاص یار د مراسمو ګډون والو ته د یادو پروژو په باب معلومات وړاندې کړل ده په خپلو خبرو کې وویل، نن د دوه منده شمل ولسوالۍ د سورکاڼي کلي د ښوونځۍ د بنسټ ډبرې په اېښودلو سره په تڼيو، ځاځي میدان، سپیره او موسی خېلو ولسوالیو کې د ۱۲ لپاره ښوونځيو د ودانیو او د ۶ ښوونځيو لپاره اړینو ملحقاتو د جوړولو کار پيل کېږي.
مراسمو ته پوهنې رئیس نصیر احمد روښان په خپله وینا کې وویل، په دې ورستیو کې د پوهنې ریاست زیات تمرکز په مرکز او ولسوالیو کې د ښوونځیو پر ودانیو دی، ده زیاته موږ له مناسب درسي چاپېریال پرته ښوونیز کیفیت نشو لوړولی.
ښاغلي روښان وویل، هڅه کوي چې د ټولو ګلالیو زده کوونکو لپاره د یوه کال موده کې د ودانیو د نۀ شتون مشکل حل کړي په وینا یې په دې برخه کې د پام وړ لاس ته راوړنې هم لري.
خوست والي محمد حلیم فدایي مراسمو ته په خپلو خبرو کې وویل زموږ تر ټولو غټ دښمن زموږ ناپوهي ده، د ناپوهۍ په ورکېدو سره زموږ ټولې بدبختي له منځه ځي.
ژمنه یې وکړه په دوه منده ولسوالۍ د شپږو ښوونځیو څخه چې دوه یې ودانۍ لري، په دوو یې کار روان دی او دوو میاشتو په جریان کې به د پاتې دوو ښوونځیو د ودانیو کارونه هم پیل شي.
د سیمې خلکو خوښي ښوده چې، د اولادونو لپاره یې د ښوونځیو وداني جوړیږي دوی په دې برخه کې له پوهنې ریاست او د ولسي تړون پروګرام له غړو ځانګړې مننه وکړه او له د دغه ښوونځیو د چارو څخه یې د هر ډول نظارت او ساتنې ډاډ ورکړ.
په دې ټولو پروژو ۸۲۵۷۹۰۰۰ افغانۍ لګښت راځي چې د اقرا برنامې له لوري پرې لګول کېږي.
د یادونې وړ ده چې دا مهال د خوست ولایت په مرکز او ولسوالیو کې د ۱۰۰ نورو ښوونځیو د ودانیو چارې هم روانې دي.
