د پوهنې محترم وزیر له لوري په بامیان ولایت کې ښوونیزه پروژه پرانیستل شوه
د پوهنې محترم وزیرالحاج مولوي حبیبالله آغا، چې د رسمي سفر په ترڅ کې بامیان ولایت ته تللی، د پوهنې ملاتړه پروژه چې د یوه همکار بنسټ له لوري د ۶۶۶ زره او ۲۹۸ ډالرو په ارزښت تمویلېږي، د یو لړ مراسمو په ترڅ کې چې ولایتي چارواکو، پوهنې مسئولینو، علماءکرامو او د خلکو استازو پکې حضور درلود، پرانیسته.
دغه حمایوي پروژه د درې بابه سیمهییزو ښوونځیو جوړول، له ښوونځي څخه مخکې زدهکړو د پراختیا ۵۲ ټولګي، ۲۴۷ تقویتي ټولګي، ۱۸۵ جبراني ټولګي، ۲۲ اوږدمهاله تعلیمي حمایوي پروګرامونه، د ۲۰۳۰ بابه ښوونځيو پروګرام په چوکاټ کې د قرطاسیو وېش او د یاد ولایت په کچه د ۱۵۴ امارتي ښووڼځيو ملاتړ په ځان کې رانغاړي.
د پوهنې محترم وزیر د خپلو خبرو په ترڅ کې د ښوونې او روزنې پر مهم رول ټینګار وکړ او ویې ویل: د دیني علومو تر څنګ د عصري علومو زدهکړه، د نن ورځې له اساسي اړتیاوو څخه ده.
نوموړي د پوهنې مسئولینو او ښوونکو ته په خطاب کې وویل: د اسلامي ټولنې خدمت او د راتلونکي نسل د روزنې په لاره کې له هېڅ ډول هڅې دریغ مه کوئ؛ تاسو د دې خاورې د راتلونکي معماران یاست او د دې وطن د بچیانو په وړاندې ستاسو مسئولیت ډېر دروند او ارزښتناک دی.
همدارنګه د پوهنې محترم وزیر ژمنه وکړه چې پوهنې وزارت به د کورنیو او بهرنیو خیریه بنسټونو په همکارۍ، په لېرې پرتو او محرومو سیمو کې د پرمختیايي پروګرامونو ملاتړ ته دوام ورکړي.
