د لغمان ولایت په ۳۰ بابه ښوونځیو کې د لمریزې برېښنا سیسټم نصب او فعال شو
د لغمان ولایت د مهترلام ښار او څلورو ولسوالیو په ۳۰ بابه ښوونځیو کې د لمریزې برېښنا سیسټمونه نصب او فعال شول، چې د یاد ولایت د پوهنې مسئولینو په حضور کې د یوې غونډې پر مهال ګټې اخیستنې ته وسپارل شول.
د یاد ولایت پوهنې رئیس محترم مولوي شاهجهان ساجد، له همکارو بنسټونو څخه د مننې ترڅنګ وویل، چې دغه شبکې هره یوه د لس کیلوواټه برېښنا د تولید ظرفیت لري او د یو همکار بنسټ له لوري د یو میلیون ډالرو په لګښت په یو شمېر ښوونځیو کې نصب او فعال شوې دي
. د نوموړي په وینا، له دې جملې ۴ بابه ښوونځي په مهترلام ښار کې، ۶ بابه ښوونځي په قرغهيي ولسوالۍ کې، ۶ بابه ښوونځي په الینګار، ۹ بابه ښوونځي په الیشنګ او ۵ بابه نور ښوونځي د لغمان ولایت په دولتشاه ولسوالۍ کې موقعیت لري.
د یادونې وړ ده، چې تر دې وړاندې هم د قرغهيي ولسوالۍ په ګلپاچا الفت او مشهخېل لېسو کې د سیمې د خلکو په ملاتړ د برېښنا شبکې نصب شوې وې، چې د پوهني ریاست رهبرۍ د خلکو له همکاریو څخه د ډالیو او ستاینلیکونو په ورکولو مننه وکړه.
