د پوهنې وزارت د ودانیو او ملکیتونو د ساتنې او مراقبت رئیس د پکتیکا ولایت له ودانیزو پروژو څخه ارزونه وکړه
د پوهنې وزارت د ودانیو او ملکیتونو د ساتنې او مراقبت رئیس محترم مولوي سمیعالحق حماس په مشرۍ د یاد وزارت تخنیکي ټیم، د پکتیکا ولایت په برمل او ګیان ولسوالیو کې د تعلیمي ودانیو جوړولو بهیر څارنه وکړه، کوم چې د پوهنې وزارت سره د همکارې یوې ادارې لخوا جوړېږي.
د یادې لیدنې په جریان کې، د کیفیت، د کار سرعت او د تخنیکي معیارونو سره سم تطبیق په اړه هر اړخیزې بیاکتنې ترسره او د یادو پروژو د ښه پلي کولو لپاره اړینې سپارښتنې ورکړل شوې.
د یاد ولایت پوهنې رئیس محترم مولوي عبدالوکیل خالد، د پوهنې وزارت د ودانیزو پروژو په اړه د پوهنې وزارت تخنیکي ټیم څارنه د ودانیو معیاري کولو په لور یو ارزښتناک ګام وباله او پکتیکا ولایت ته یې د یاد پلاوي د سفر هرکلی وکړ.
