د پوهنې محترم وزیر په بامیان ولایت کې د ۲ بابه ښوونځیو نوې ودانۍ پرانیستې
د پوهنې وزیر محترم الحاج مولوي حبیب الله آغا بامیان ولایت ته د خپل رسمي سفر په ترڅ کې، د یاد ولایت د والي محترم مولوي عبدالله سرحدي په ملتیا، په سیغان او یکاولنګ ولسوالیو کې د ۲ بابه ښوونځیو نوې ودانۍ افتتاح او ګټې اخیستنې ته وسپارلې.
یادې ودانۍ چې له پوهنې سره د یوې همکارې ادارې په مالي مرسته د ۴۶ مېلیونه افغانیو په لګښت جوړې شوې دي، هره یوه یې ۱۶ درسي خونې، لابراتوارونه، د کنفرانسونو تالارونه، اداري خونې او د لوبو میدانونه لري.
همدارنګه په بامیان ولایت کې د ۲۴ بابه ښوونځیو بیارغونې او د ۴۶ نورو ښوونځیو لپاره د لمریزې برېښنا سیسټمونو نصبولو پروژې هم د پوهنې محترم وزیر له خوا د ۶۳ مېلیونه افغانیو په لګښت سره افتتاح شوې.
د پوهنې محترم وزیر د پورته ذکر شویو ښوونځیو او پروژو د پرانیستلو په مراسمو کې وویل: " موږ د موجوده اړتیاوو پر بنسټ، د زدهکوونکو لپاره د مناسب تعلیمي چاپېریال رامنځته کولو ته لومړیتوب ورکړی او د دې اصل پلي کولو لپاره لازیاتې هڅې کوو."
