په لغمان ولایت کې د مدارسو مسئولینو لپاره میتودیکي ورکشاپ جوړ شو
د لغمان ولایت پوهنې ریاست، د بادپښ ولسوالۍ مسلکي پراختیا علمي غړو سره په همکارۍ، د یادې ولسوالۍ د مهتممینو، مدرسینو او مدارسو د چارواکو مسلکي، اداري او تدریسي وړتیاوو لوړولو لپاره یو علمي او میتودیکي ورکشاپ ترسره کړ.
په دغه ورکشاپ کې ګډونوالو ته د مېتود پېژندنې، د هغو پلي کولو لارې او د مېتودونو بېلابېل ډولونه لکه؛ پوښتنې- ځوابونه، لېکچرونه، ډلهییز فعالیتونه او نورو په اړه) مفصل معلومات ورکړل شول.
د پوهنې مسئولینو په خپله پرانیستونکې وینا کې له مدرسینو وغوښتل چې له درسي پلان څخه پرته تدریس ونه کړي او د پوهنې وزارت د قانون، نصاب او کړنلارو پر بنسټ خپل درسي پلانونه چمتو کړي او د مېتودولوژۍ پر اساس د تدریس پروسه پرمخ یوسي.
همدارنګه هغوی په مدارسو او ښوونځيو کې د نویو زدهکوونکو په جذبولو ټینګار وکړ او مهتممین یې وهڅول چې د جوماتونو د منبرونو له لارې خلک له یادې موضوع څخه خبر کړي ترڅو هغوی هم په دې کمپاین کې فعاله برخه واخلي.
