د پوهنې وزارت د مالي او حسابداري او د مالیې وزارت عوايدو ریاستونو ګډه غونډه جوړه شوه
د پوهنې وزارت د مالي او حسابداري رئيس الحاج مولوي صدرالدین سعد په مشرۍ، د مالیې وزارت د عوایدو لوی ریاست د استازو په ګډون کاري او مشورتي ناسته د عوایدو د زیاتوالي او د مالي ضایعاتو د مخنیوي په موخه جوړه شوه.
په ياده غونډه کې د پوهنې وزارت له جايدادونو څخه د سالمې ګټې اخیستنې، د عوایدو د زیاتوالي په برخه کې د مسلکي تدبیرونو او پلانونو د تصویب او یو شمېر اړوندو مسایلو په اړه هر اړخیز بحثونه ترسره او لازمې برېکړې وشوې.
په ورته مهال دواړو لورو د پوهنې او مالیې وزارتونو د مالي او عوایدو د ریاستونو ترمنځ د متقابلو او دوامداره همکاریو په اړه خبرې وکړې او په دې هکله يې د ګډ تخنیکي ټېم د جوړولو خبر ورکړ.
غونډه د دعائیې په لوستلو سره پای ته ورسېده.
