په بامیان ولایت کې د زندانیانو لپاره د قرآن کریم او سواد زده کړې ټولګي پرانیستل شول
د باميان ولايت پوهنې رياست، په هېواد کې د بې سوادۍ د له منځه وړلو په موخه د خپلو کړنو د يوې برخې په توګه، يو ځل بيا د یاد ولايت د زندانیانو لپاره د قرآن کريم او سواد زده کړې درسي ټولګي جوړ کړل.
د يادو ټولګیو د پرانيستلو په مراسمو کې د پوهنې رئيس الحاج مولوي رحمت الله قنديلي، د باميان ولايت د زندانونو د چارو د تنظيم او ادارې رئيس مولوي محمد ابراهيم حقاني، يو شمېر ملکي او نظامي مسئولينو هم برخه اخيستې وه.
د باميان ولايت پوهنې رئيس د یاد ولایت زندانیانو ته د سواد پر ارزښت خبرې وکړې او د علومو په ځانګړي ډول د ديني علومو د زده کړې پر اړتيا يې ټينګار وکړ.
دغه راز د یاد ولایت د زندانونو چارو د تنظيم او ادارې رئیس مولوي محمد ابراهيم حقاني هم د سواد زده کړې په لاره کې د پوهنې رياست د مشرتابه پلاوي نه ستړي کېدونکي هلې ځلې مهمې او د قدر وړ وبللې.
په پای کې د سواد زده کړې پر زده کوونکو کتابونه او ښوونیز توکي ووېشل شول.
