د پوهنې وزارت د څارنې او ارزونې ریاست د کارکوونکو ورکشاپ پای ته ورسېد
د پوهنې وزارت د کیفیت تضمین معینیت د څارنې او ارزونې ریاست درې ورځنی ښوونیز ورکشاپ چې د یاد ریاست د کارکوونکو د کاري وړتیاوو د لوړولو په موخه جوړ شوی ؤ، د یاد ریاست د رئیس مولوي غلام ربي رباني په ویناء پای ته ورسېد.
د پوهنې وزارت د څارنې او ارزونې ریاست مسئولین وایي، د یاد ورکشاپ له جوړېدو یې اساسي موخه، د ټکنالوژۍ او ډیټابیس په برخه کې د اړوندو کارکوونکو د مسلکي پوهې پیاوړتیا او د هغوی د کاري وړتیاوو لوړول وو.
د څارنې او ارزونې رئیس د خپلو خبرو په ترڅ کې د کارکوونکو د مسلکي پوهې او کاري وړتیاوو لوړول د ادارې له بنسټیزو عناصرو څخه وبلل.
ورپسې د یاد ورکشاپ ګډون والو د دا ډول روزنيزو غونډو جوړول خورا مهم وګڼل او د يادو ورکشاپونو د تنظيم په برخه کې يې د پوهنې وزارت د مشرتابه او په ځانګړې توګه د څارنې او ارزونې رياست له هڅو ستاینه وکړه او پر دوام یې ټینګار وکړ.
