له ولایتونو څخه د پوهنې خبرونو لنډیز
پکتیا
د پوهنې وزارت د کیفیت تضمین معینیت د څارنې او ارزونې رئیس پکتیا ولایت ته د یوه رسمي سفر په ترڅ کې، د یاد ولایت د پوهنې ریاست له رئیس سره یې په لیدنه کې د خپل سفر موخه، د پوهنې ریاست او ولسوالیو د مرکزي څانګو له فعالیتونو څخه څارنه او ارزونه وبلله.
بغلان
د بغلان ولایت پوهنې رئیس الحاج مولوي محمد نور عزیزي د ACD مؤسسې له مسئولینو سره وکتل او د محلي چټکو زده کړو د ټولګیو د پرانیستلو، د ښوونکو د ګمارنې او د هغوی د معاشونو د ورکړې په اړه یې لازم تصمیمونه ونیول.
ننګرهار
په دې وروستیو کې د ننګرهار ولایت پوهنې ریاست مشرتابه، د یاد ولایت د پچیراګام او چپرهار ولسوالیو د پوهنې نوي آمرین خپلو همکارانو ته ور وپېژندل.
له بل لوري نويو ګمارل شويو آمرینو د یاد رياست مشرتابه ته ډاډ ورکړ، چې په خپل ټول توان سره به د پوهنې د پلانونو د عملي کولو لپاره هلې ځلې وکړي.
لغمان
د لغمان ولايت پوهنې رئيس مولوي شاه جهان ساجد او د یاد ریاست تخنيکي ټېم د بادپخ ولسوالۍ اړوند د بادپخ، شاه ګليان او گروچ د ښوونځيو بيارغاونې چارې وڅارلې او د کار او ساختماني موادو پر ښه کيفيت يې ټينګار وکړ.
همدارنګه؛
د لغمان ولایت پوهنې رییس وایي: د قرغیو او بادپخ ولسوالیو د ۲۰ ښوونځیو د بیارغونې چارې، د یوې همکارې مؤسسې په مالي ملاتړ سره د ۲۸۰۰ زره افغانیو په لګښت روانې دي؛ چې ډېر ژر به یې چارې بشپړې او ګټې اخیستنې ته وسپارل شي.
د یو بل خبر له مخې:
د لغمان ولایت پوهنې رئیس د بادپخ ولسوالۍ د ګروچ ښوونځي اداري، تدریسي او تحصیلي اسناد وڅېړل او د ځینو کاري تشو د ډکولو په موخه یې اړوندو مسئولینو ته لازمې لارښوونې وکړې.
