له ولایتونو څخه د پوهنې لنډ خبرونه
بغلان
د پوهنې وزارت د همغږۍ، څارنې او تطبیق پلاوي د یوه رسمي سفر په ترڅ کې، د بغلان ولایت پوهنې ریاست د تطبیق شوو معاشاتو مالي اسناد وڅېړل او د یاد ولایت پوهنې له رئیس الحاج مولوي محمد نورعزیزي سره یې د اړینو مسایلو په اړه بحث او خبرې وکړې.
بلخ
د بلخ ولایت پوهنې رئیس الحاج مولوي عبدالجلیل شهید خېل د یوه کاري سفر په ترڅ کې، چمتال ولسوالۍ ته ولاړ.
نوموړي د یادې ولسوالۍ د ښوونیز وضعیت ارزونې پرمهال، د پوهنې له مسئولینو، علماوو او مشرانو سره د همغږۍ غونډه وکړه او له هغوی څخه یې د چمتال ولسوالۍ له پوهنې آمریت څخه د ملاتړ غوښتنه وکړه.
په ورته مهال د یاد ولايت د چهاربولک او کشنده ولسواليو نوي ګمارل شوي آمرین او د ځينو ښوونځيو مدېران هم د پوهنې مسئولينو له لوري کارکوونکو او زده کوونکو ته ور وپېژندل شول.
هلمند
د هلمند ولايت پوهنې رئيس الحاج مولوي محمد عوض انصاري، د پوهنې عمومي وضعيت د څېړلو په موخه، د یاد ولايت سنګين او موسى کلا ولسواليو ته ولاړ او د بېلابېلو غونډو په ترڅ کې يې، د ښوونځيو له مسئولينو او ديني علماوو سره د نویو ښوونکو د ګمارنې او د دیني زده کړو د کړنلارې په اړه تفصیلي خبرې وکړې.
ننګرهار
د ننګرهار ولایت پوهنې ریاست په هلوځلو، له ګاونډیو هېوادونو له راستانه شویو زده کوونکو څخه د سویې د تثبیت آزموینه واخیستل شوه.
په پام کې ده چې د یادې آزموینې بریالي نوماندان د ښوونځیو په اووم، آتم او نهم ټولګیو کې جذب شي.
