له ولایتونو څخه د پوهنې خبرونه
هرات
د هرات ولايت د پوهنې رئيس الحاج مولوي عبدالله اميني د رباط سنګي کشک د پوهنې امریت، علمیه فاروقيه مدرسې، رباط سنګي د هلکانو ښوونځي او نورانيه خصوصي ښوونځي له اداري او تدريسي چارو څخه څارنه وکړه.
نیمروز
د نیمروز ولایت د پوهنې رئیس الحاج مولوي ګل احمد حقاني د زرنج ښار د تعلیم القرآن مدرسې له بېلابېلو برخو څخه څارنه وکړه او استادان یې وهڅول چې د هېواد د ځوان نسل او زده کوونکو په روزنه کې اخلاص وکړي.
په یاده لیدنه کې د مدرسې ستونزې د پوهنې ریاست له لورې یاداشت او د یادو ستونزو د حل ژمنه وکړه.
ننګرهار
ننګرهار ولايت د بهسودو ولسوالۍ د ۲۴ ښوونځيو د ۱۶۲۴ تنو زده کوونکو د فراغت په مناسبت غونډه ترسره شوه په یاده غونډه کې د پوهنې رئيس او ګڼ شمېر مسوولينو، علماوو، ښوونکو، زده کوونکو او د فارغینو د کورنيو ګډون درلود.
د پوهنې رئیس فارغینو ته د مبارکۍ تر څنګ زیاته کړه چې: زده کړه یو الهي امر دی او پر زده کړو کولو یې ټینګار وکړ.
د یادونې وړ ده، چې ممتاز زده کوونکي یې د لب ټاپ کمپیوټرونو، موبایلونو او ستاینلکونو په ورکولو سره وستایل.
پروان
د پروان ولایت د پوهنې رئیس مفتي محمد حسن حقاني د خصوصي ښوونځیو او کورسونو له مسؤلینو سره غونډه ترسره کړه او له هغوي وغوښتل چې خپل ښوونیز فعالیتونه له قانون او د پوهنې له طرزالعمل سره سم برابر کړي. له ټولو ښوونیزو خصوصي ادارو څخه یې غوښتنه وکړه چې له جواز پرته فعالیت ونه کړي.
