له ولایتونو څخه د پوهنې خبرونه
پنجشیر
د پنجشير پوهنې رئيس مولانا غلام ایشان حماس او ورسره پلاوي په بازارک ولسوالۍ کې د مسعود شهيد ديني مدرسې اداري ستونزې يې وڅېړلې او د دې ولسوالۍ د پوهنې آمریت له کارکوونکو يې وغوښتل چې خپلې ښوونیزې چارې د پوهنې وزارت له قوانینو سره سم ترسره کړي .
د پنجشېر پوهنې رئيس د يادې شوې مدرسې د زده کوونکو ستاینه وکړه او هغوی یې زده کړو ته وهڅول.
سرپل
د سرپل ولایت پوهنې رئیس مولوي محمد رحماني د پوهنې او د تعلیمي څارنې له مسوولینو سره یو ځای د خواجه ارچغ او سه توت له ښوونځیو څخه لیدنه وکړه. نوموړي د يادو ښوونځيو له مديرانو او ښوونکو څخه وغوښتل، چې د نوي نسل د سالمې روزنې په برخه کې له هېڅ ډول هڅو څخه ډډه ونه کړي.
نوموړي پر زده کوونکو د ښوونیزو توکو د وېش پر مهال هغوی د علم زده کړي ته وهڅول.
غزني
د مالستان ولسوالۍ د ښوونځيو ښوونکو او زده کوونکو ته د يونيسف د سيمه ييز دفتر په مرسته د ښوونیزو بستو د وېش لړۍ پيل شوه.
نیمروز
د نيمروز پوهنې رياست د کارکوونکو د ارزونې بهير د دغه ولايت د پوهنې رئيس الحاج مولوي ګل احمد حقاني تر څارنې لاندې پيل شو.
د نيمروز پوهنې رئيس د مامورينو په تجربو د ټينګار تر څنګ زياته کړه: د ارزونې بهير به دوه ورځې دوام وکړي او په ترڅ کې به يې پنځوس تنه کارکوونکي و ارزول شي.
ارزګان
د ارزګان پوهنې ریاست سره په همغږۍ NRC موسسې د دغه ولایت د یو شمېر ښوونځیو ښوونکو او زده کوونکو ته روغتیایي او ښوونیزې بستې ووېشلې.
د اروزګان د پوهني رياست مشرتابه د يادو توکو له وېش څخه خوښي څرګنده کړه او د دا ډول مرستو پر دوام يې ټينګار وکړ.
