د کاپیسا او پنجشیر له پوهنې ریاستونو څخه خبرونه
کاپیسا
د کاپیسا ولایت د پوهنې رئیس مولوي محمد فرید حقاني او ورسره مل پلاوي د عبدالله ابن مسعود (رض)، شهید مولوي ګل محمد حنیف یار او د عبدالله ابن مسعود (رض) الحاقیه مدارسو د ښوونیزو فعالیتونو څارنه وکړه.
د دغو دیني بنسټونو مسوولینو ته د لازمو مشورو ورکولو ترڅنګ ممتازو زده کوونکو ته د کتابچو په ډالۍ کولو سره وستایل شول.
کاپیسا
په دې وروستیو کې توریالی د عنایت الله شهید لېسې د آمر په توګه او خواجه افضل د دې ولایت د دویمې حصې ولسوالۍ د محمد طاهر شهید لېسې د آمر په توګه وټاکل شول.
نوموړي د پوهنې د مسوولینو، دیني عالمانو او د قومي مشرانو په ګډون د یو لړ مراسمو په ترڅ کې خپلو همکارانو ته ور وپېژندل شول.
دواړو آمرینو ژمنې وکړې چې د هېواد د ماشومانو لپاره د باکیفیته ښوونیزو خدمتونو او اسانتیاوو د وړاندې کولو په برخه کې به لا ډېرې هڅې وکړي.
کاپیسا
د کاپيسا پوهنې رياست مسوولين وايي: د دغه ولايت ښوونځيو ته يې د درسي کتابونو د وېش لړۍ پيل کړې ده.
د دوى په وينا: دغه پروسه د يو لړ مراسمو په ترڅ کې د پوهنې رياست د مشرتابه پلاوي او د يو شمېر سيمه ييزو ادارو د استازو په ګډون پرانيستل شوه او ښوونځيو ته يې د لېږد پروسه په رسمي ډول پيل کړه.
ويل کيږي چې دغه کتابونه د هېواد په دوو ملي ژبو (دري او پښتو) کې چاپ شوي دي، چې له لومړي څخه تر لسم ټولګي پورې شامل دي.
پنجشیر
د پنجشير ولايت د پوهنې رئيس مولانا غلام ایشان حماس ویلي دي: هغه٢٠ زره او ٤٤٠ ټوکه درسي کتابونه چې له وړاندې د پوهنې وزارت له خوا د دغه رياست د اسلامي زده کړو آمریت ته ليږل شوي وو د دې ولایت د مرکز او ولسواليو په ګډون په ټولو ديني مدارسو ووېشل شول .
نوموړی زياتوي: ياد شوي درسي کتابونه ٥٣ بېلابېل عنوانونه لري، چې د دې کتابونو په ورکړې سره به د هغو دیني مدارسو ستونزې هوارې شي، چې د درسي کتابونو له کمښت سره مخ وو.
د پنجشير د پوهنې رياست د اسلامي زده کړو آمر الحاج مولوي مفتي جواد د دغه ولايت د ديني مدارسو له مسوولينو سره مشورتي غونډه وکړه .
نوموړي زياته کړه: د دې غونډې له جوړېدو څخه يې موخه د دغه ولايت د مدارسو او دارالعلومونو د اداري او تدريسي چارو د لا ښه ترسره کولو په موخه د لازمو اقداماتو ترسره کول دي.
همدارنګه د نويو تشکیلاتو، د ښوونیزو اسانتیاوو، د نویو زده کوونکو د جذبولو او د راپورونو او کاري پلانونو د تنظیم پر څرنګوالي هم بحث او پرېکړې وشوې.
