له ولایتونو څخه د پوهنې خبرونه
بلخ
د بلخ ولايت د پوهنې رياست سکتوري غونډه د دغه رياست د ښوونې او روزنې آمر مولوي غفران هجرت تر څارنې لاندې د بلخ پوهنتون د اقتصاد پوهنځي او د مرستندويه بنسټونو د استازو په ګډون جوړه شوه.
راغلو استازو هر یو په خپل وار د تیرې میاشتې د فعالیتونو راپور او خپل راتلونکي پلانونه بیان کړل او د خپلو پلانونو په عملي کولو کې یې د بلخ ولایت د پوهنې ریاست د مرستو غوښتنه وکړه.
د بلخ د پوهنې ریاست مشرتابه د سیمه ییزو ادارو او مرستندویو بنسټونو له مرستو څخه مننه وکړه او ژمنه یې وکړه، چې د پروګرامونو د عملي کولو په برخه کې به لازمې اسانتیاوې برابرې کړي.
همدارنګه
د پوهنې وزارت د درسي کتابونو د چاپ او وېش آمریت مسوولینو د بلخ ولایت د پوهنې له رئیس الحاج مولوي عبدالجلیل شهیدخېل سره وکتل.
په دې کتنه کې د بلخ ولایت د پوهنې رئيس د درسي کتابونو د وېش له پيل څخه خوښي وښوده او هيله يې څرګنده کړه چې دغه بهير ژر تر ژره ترسره شي.
لغمان
په لغمان ولایت کې د ماشومانو د ساتنې موسسې سیمه ییزو استازو د دغه ولایت د پوهنې له رئیس مولوي شاه جهان ساجد سره وکتل او د لغمان ولایت د سیمه ییزو زده کړو د ټولګیو د پروګرامونو او ستونزو په باب یې خبرې وکړې.
په دې کتنه کې د پوهنې رئیس د لغمان په ښوونځیو کې د شته ستونزو په باب د خبرو تر څنګ د دې موسسې له ښوونیزو خدمتونو څخه مننه وکړه او له مسوولینو یې وغوښتل چې د پوهنې وزارت د هوکړه لیکونو په رڼا کې خپلو فعالیتونو ته دوام ورکړي.
په یو بل خبر کې راځي.
د لغمان ولایت د پوهنې رئیس د دې ریاست د پلټنې او انسجام له آمرینو سره یو ځای د ګمین د نجونو له لیسې څخه لیدنه وکړه، د زده کوونکو د تعلیمي کچې د ارزولو ترڅنګ له مسوولینو یې وغوښتل، ترڅو د ښوونځي درسي کیفیت ته پاملرنه وکړي .
د یو بل خبر له مخې
په لغمان ولایت کې د ډیوې کلي اوسېدونکو د دغه ولایت د پوهنې له رئیس سره په لیدنه کې په خپل کلي کې له شته ښوونیزو امکاناتو څخه خوښي څرګنده کړه او په دې برخه کې یې خپلې یو لړ ستونزې د پوهنې ریاست له مشرتابه سره شریکې کړې.
د لغمان پوهنې رئیس دوی ته د لا زیاتو ښوونیزو خدمتونو او امکاناتو د برابرولو ژمنه وکړه.
