له ولایتونو څخه د پوهنې لنډ خبرونه
کندهار:
د کندهار ولایت د پوهنې رئیس الحاج مولوي فخرالدین نقشبندي مرکز ته د یوه کاري سفر په ترڅ کې د پوهنې وزارت له سرپرست وزیر الحاج مولوي حبیب الله آغا سره وکتل. په دې کتنه کې یې د کندهار د پوهنې ریاست د لاسته راوړنو او ستونزو په اړه د دغه وزارت مشرتابه ته راپور وړاندې کړ.
د پوهنې سرپرست وزیر د دغه ولایت د پوهنې ریاست له هڅو څخه د مننې ترڅنګ ژمنه وکړه، چې یادو ستونزو ته به د حل معقولې لارې چارې پیدا کړي.
لوګر:
د HHOA موسسې د لوګر ولایت د پوهنې ریاست سره په همغږۍ د دې ولایت په برکي برک او څرخ ولسوالیو کې د سواد زده کړې د ټولګیو لپاره د ۲۹ تنو نارینه او ښځینه ښوونکو د ګمارلو په موخه رقابتي ازموینې ترسره کړې.
په پام کې ده، چې ګمارل شوي ښوونکي 435 تنو زده کونکو ته تدریس وکړي.
بلخ:
د بلخ ولایت د مارمل ولسوالۍ د پوهنې ریاست د مدیرانو، سرښوونکو، د ښوونځیو د معتمدینو او د سواد زده کړې د چارو د ظرفیت لوړولو په موخه د پلان جوړونې او اداري چارو په برخه کې درې ورځنی سمینار جوړ کړ.
په یو بل خبر کې:
د شولګره ولسوالۍ د پوهنې آمرینو او د تعلیمي څارنې غړو د روضت القرآن، امام ابوحنیفه او د رسالت رسول د مدارسو له تدریسي بهیر څخه لیدنه وکړه.
همدارنګه:
د بلخ ولایت د حیرتان ولسوالۍ د پوهنې آمرینو او د تعلیمي څارنې غړو د ابی بن کعب او د ریاض القرآن د مدارسو له تدریسي بهیر څخه د څارنې په ترڅ کې د یادو بنسټونو د ښوونکو او استادانو د تدریس طریقې یې وڅېړلې او له هغوی څخه یې وغوښتل چې د تدریسي په جریان کې باید هڅه وکړي، ترڅو په زده کوونکو کې د اسلامي ارزښتونو او د هېواد پالنې روحيې پیاوړي کړي.
