له ولایاتو څخه د پوهنې څو لنډ خبرونه

هرات:
د پوهنې وزارت د کیفیت د تضمین معین مولوي عبدالخالق صادق او ورسره ملګري پلاوي یې په داسې حال کې چې د هرات ولایت د پوهنې ریاست مشرتابه او مسوولینو هم حضور درلود، د دغه ولایت د مرکزي جهادي مدرسې، انصاري یتیم خانې او حاجي عبدالظاهر بشیري خصوصي ښوونځي څخه لیدنه وکړه. .
نوموړي د يادو ښوونیزو بنسټونو د اداري او تدريسي چارو د کتنې پر مهال له استادانو او مسوولينو سره د هغوى د ستونزو او اړتياوو په اړه خبرې وکړې او د جهادي مرکزي مدرسې د وضعيت د لا ښه والي په موخه يې لازمې لارښوونې وکړې.
جوزجان:
د پوهنې وزارت ستر سلاکار الحاج مولوي سید غیاث الدین آغا جوزجان ولایت ته د یوه رسمي سفر په ترڅ کې د دغه ولایت له جهادي مدرسې او یتیم خانې څخه لیدنه وکړه.
د پوهنې وزارت سلاکار د يادې شوې جهادي مدرسې د مسوولينو او د پوهنې د ريس د هلو ځلو د ستاينې په ترڅ کې د يادې مدرسې زده کوونکي تشويق کړل او ويې ويل:
تاسو د دې هیواد د راتلونکي جوړونکي یاست، تاسو باید هڅه وکړئ او خپل درسونه په ښه توګه زده کړئ ترڅو په راتلونکي کې د خپلو خلکو او هیواد لپاره په ښه توګه خدمت وکړئ.
کندز:
د کندز ولایت د پوهنې ریس مولوي محمد اسماعیل ابو احمد او د پوهنې ریاست د اسلامي زده کړو آمر مولوي غلام رسول حقاني د ارچي ولسوالۍ د اصحاب الصفه له یتیم خانې څخه لیدنه وکړه.
په دې لیدنه کې د دغه ولایت د پوهنې ریاست مشرتابه د ښوونې او روزنې پر کیفیت یې ټینګار وکړ او د یتیم خانو زده کوونکي یې وهڅول چې د قرانکریم حفظ وکړي او همدارنګه دیني او عصري علوم زده کړي.
لغمان:
د سره صليب موسسې په مالي مرسته د لغمان ولايت په الينګار ولسوالۍ کې د ۱۳ ښوونځيو د بيارغونې چارې بشپړې او ګټې اخيستنې ته وسپارل شوې.
د دغه ولايت د پوهنې رئيس مولوي شاه جهان ساجد د دې ادارې له مسوولينو څخه د مننې په ترڅ کې زياته کړه: دغه ښوونځي د تېرو کلونو د جګړو له امله ويجاړ شوي وو او اوس يې د سره صليب په مالي مرسته د عابد کاسي ساختماني شرکت له خوا د درې میاشتو په موده کې بیا ځلې ورغول شول او دا دی اوس ګټې اخیستنې ته سپارل کېږي.
پنجشیر:
د پنجشير ولايت د پوهنې رئيس مولانا غلام عصان حماس او ورسره مل پلاوي د دغه ولايت د رخې لېسې د ازموینو له بهیر څخه یې لیدنه وکړه او همدا ډول د دې لیسې له اداري چارو څخه یې هم څارنه وکړه.