له مرکز او ولایاتو څخه د پوهنې لنډ خبرونه

کابل:
د کابل ولایت د قرباغ ولسوالۍ د پوهنې آمریت مسوولین وايي: د یوې غونډې په ترڅ کې د ستاینلیکونو په ورکولو سره د دې ولسوالۍ د ښوونځیو له ښوونکو او سرښوونکو څخه ستاینه وشوه.
د پوهنې کارکوونکو، دیني عالمانو، دولتي چارواکو او د سیمې خلکو چې د دې غونډې برخه وال وو، هغوی ښوونکي یې د پوهې مشال وبلل او ژمنه یې وکړه، چې په هر ډول حالاتو کې به د دوی تر څنګ ولاړ وي.
همدارنګه:
د کابل ولایت د میربچه کوټ ولسوالۍ د پوهنې آمریت غړو د خروټي له کلي او بابا قچقار له منځنیو ښوونځیو څخه لیدنه وکړه او تدریسي او اداري چارې یې له نږدې وڅارلې او د زده کوونکو د کلنیو ازموینو بهیر یې له نږدې وکتل.
لغمان:
د لغمان ولایت د پوهنې ریاست مسوولینو د مهترلامک لېسې، ګمین نجونو ښوونځي او له امین حقیار خصوصي لېسې له اداري او تدریسي چارو څخه لیدنه وکړه او د یادو لېسو پر زده کوونکو یې د کتابچو د وېشلو پر مهال اړوندو مسوولینو ته یې د ښوونې او روزنې د کیفیت لوړولو په اړه لازمې لارښوونې وکړې..
پروان:
د پروان ولايت د پوهنې رئيس محمد حسن حقاني د دغه ولايت د دولسمو ټولګيو د نجونو د کلنۍ ازموينې د ترسره کولو په موخه د دغه ولايت د پوهنې له آمرینو او مسوولينو سره یې غونډه وکړه او له هغوى څخه يې وغوښتل، چې دغه ازموينې دې له طرزالعمل سره سم واخلي. او د پوهنې وزارت ټول اصول دې په پام کې ونیسي.
کندهار:
د کندهار ولايت د غورک ولسوالۍ د پوهنې آمر مولوي داد محمد حنفي د دې ولسوالۍ د يو شمېر ښوونځيو له تدریسي چارو څخه څارنه وکړه.
نوموړي د يادو ښوونځيو د زده کوونکو علمي سویه مثبته و ارزوله او د ښوونکو او مسوولينو له هڅو يې مننه وکړه.