له مرکز او ولایتونو څخه د پوهنې لنډ خبرونه.

نورستان:
د نورستان ولایت د منډول ولسوالۍ قومي مشرانو،دیني عالمانو او مخورو سپین ږیرو د دغه ولایت د پوهنې له رئیس تاج محمد مطمین سره په لیدنه کې د پوهنې په برخه کې د هغه د وروستیو لاسته راوړنو د ستاینې ترڅنګ د یادې ولسوالۍ د پوهنې ستونزې یې له هغه سره شریکې کړې، ترڅو رسیده ګي ورته وشي.
د يو بل خبر له مخې:
د نورستان د پوهنې ریاست د څارنې آمر مولوي رحمت الله مبارز د دغه ولایت د دواب او مندول ولسوالیو د ښوونې او روزنې عمومي وضعیت یې وڅېړل او پایله یې د یاد ولایت د پوهنې له ریاست سره شریکه کړه.
 ښاغلي مبارز د تشکيل نشتوالى، د ښوونځيو بیارغول او د درسي کتابونو نشتوالى یې په يادو ولسواليو کې د پوهنې په برخه کې عمده ستونزې یادې کړې.
کابل:
د کابل ولایت د خاک جبار ولسوالۍ د پوهنې آمر مولوي صلاح الدین ایوبي د دې ولسوالۍ د سیمه ییزو ښوونیزو ټولګیو له درسي نصاب څخه لیدنه وکړه او د یادو ټولګیو له تدریسي او اداري مسوولینو څخه یې مننه وکړه.
لغمان:
خصوصي مدارسو ته د پوهنې وزارت د اسلامي زده کړو د معینیت له لوري د نغدي مرستو د وېش لړۍ په دوام یې دا ځل د لغمان ولایت د ښاري سیمو له خصوصي مدارسو سره مرستې وکړې.
د دغه معینیت مسوولینو د لغمان ولایت د پوهنې په ریاست کې د یوې غونډې په ترڅ کې د دغو مدارسو پر زده کوونکو یې یادې نغدې مرستې ووېشلې او د مصرفولو پر شفافیت یې ټینګار وکړ.
سمنګان:
د سمنګان ولایت د پوهنې رئیس مولوي نصرت الله فیضاني له خپل یوه پلاوي سره د دغه ولایت د فیروزنخچیر ولسوالۍ ته ولاړ او د دې ولسوالۍ د پوهنې له مسوولینو سره یې وکتل، د هغوی ستونزې او وړاندیزونه یې ولیکلې او وعده یې وکړه، چې  د دوی ستونزې به د پوهنې وزارت له مشرباته سره شریکوي.
پنجشیر:
دپنجشير ولايت د پوهنې رئيس مولانا غلام ایشان حماس په يوه کاري غونډه کې د دغه ولايت د پوهنې له مسوولينو څخه وغوښتل چې په حاضري ټینګار وکړي، ادارې اصول مراعات کړي او په خپلو دندو کې له صداقت او اخلاص څخه کار واخلي او خپل کاري ګذارشونه دې په وخت سره چمتو او پوهنې ریاست ته یې واستوي.