غور ولایت کې د پوهنې ریاست کارکوونکو ته د کرونا واکسین لګول پیل شول
پوهنې وزارت، غور: د غور ولایت د عامې روغتیا ریاست له لوري د یاد ولایت د پوهنې ریاست کارکوونکو ته د کرونا واکسین د لګولو لړۍ په رسمي ډول پیل شوه چې د یادې ادارې ټول کارکوونکي به واکسین شي.
د غور ولایت روغتیایی چارواکو ژمنه کړې چې د یاد ولایت په مرکز او ولسوالیو کې به د پوهنې ریاست ټولو اداري کارکوونکو او ښوونکو ته د کرونا واکسین چمتو کړي.
د غور د پوهنې ریاست د عمومي تعلیماتو آمر، الحاج فضل الحق نجات د دغه ولایت د عامې روغتیا ریاست هڅې وستایلې او مننه یې وکړه، چې د پوهنې ریاست کارکوونکو ته یې د کرونا واکسین د لګولو لړۍ پیل کړې.
ښاغلي نجات له ټولو کارکوونکو وغوښتل چې واکسین وکړي او د عامې روغتیا ریاست سپارښتنې په پام کې ونیسي، څو له دې وژونکې ناروغۍ څخه ځان وژغوري.
نوموړي زیاته کړه: د کرونا واکسین په لګولو سره ، به د یاد ریاست کارکوونکي د دې وایروس له خطر څخه خوندي شي او د دې ولایت په تعلیمي بنسټونو کې به د دې ناروغۍ د لا خوریدو مخنیوی وشي.
