د سرپل ولایت پوهنې ریاست کې د کرونا وایروس د واکسین لګولو بهیر پلی شو
پوهنې وزارت، سرپل : د سرپل ولایت پوهنې ریاست کې د کرونا وایروس د واکسین لګولو بهیر د یاد ولایت والي قربانمراد مراد، د عامې روغتیا ریاست د بیړنیو مراقبتونو رئیس، د پوهنې ریاست کارکوونکو، د روغتیایي چوپړتیاوو وړاندې کوونکو، د یونیسیف ادارې چارواکو او په سرپل ولایت کې د نړیوال روغتیایي سازمان استازو په ګډون، د پوهنې ریاست مرستیال او سرپرست سید نسیم سادات ته په واکسین لګولو سره پیل شو.
د سرپل ولایت د پوهنې ریاست سرپرست، د یاد بهیر له پلي کیدو څخه خوښي څرګنده کړه او د پوهنې ریاست له ټولو چارواکو یې وغوښتل چې واکسین ولګوي او د عامي روغتیا ریاست لارښوونې په پام کې ونیسي.
د پوهنې ریاست سرپرست د ولایت له مشرتابه او د عامې روغتیا ریاست، له پاملرنې ځانګړې مننه وکړه.
د یادونې وړ ده، چې د سرپل ولایت په مرکز او ولسوالیو کې به د پوهنې ریاست ټولو کارکوونکو او ښوونکو ته د کرونا واکسين ولګول شي.
