د پوهنې وزارت په نویو اصلاحاتو کې د اسلام مرکزي رول یا ونډه
د مسلمانو ټولنو لپاره ښوونه او روزنه یو حتمي او ضروري عمل بلل کیږي، ځکه حضرت محمد “ صلی الله علیه وسلم “ ښوونه او روزنه لازمي بللې. په یو مشهور حدیث کې حضرت محمد “ صلی الله علیه وسلم “ داسې فرمایلي: طَلَبُ العلم فَرِيضَةٌ علي كُلِّ مُسْلِمٍ، ( د علم زده کړه پر هر مسلمان باندې فرض ده) سنن ابن ماجه ۲۲۴. علماو دغه حدیث په دې توګه تشریح کړی. لومړی، دغه فرضیت د نافع علومو لپاره دی چې خلک الله (ج) ته نږدې کوي.
دویم، دغه علوم دوې سرچینې لري، چې لومړۍ یې الهي وحې او دویمه یې انساني تجربې جودوي. په عمومی توګه علم یا علوم په دوه کتګوریو ویشل کیږي.
لومرۍ کتګوري یې د فرض عین علوم دي چي د هغو ترلاسه کول پر هر عاقل او بالغ مسلمان فرض ګڼل کیږي. دویمه کتګوري یې د فرض کفایي علومو په نامه یادیږي، چی فرض کفايي علوم پر ټولو مکلفینو فرض ګڼل کیږي، خو که چیرې یو تعداد کسان دغه علوم ترلاسه کړي د نورو له غاړې بیا ساقط کیږي، ولې که چیرې یو تعداد کسان فرض عین علوم ترسره کړي د نورو له غاړې د دغه علومو ترسره کیدنه نه ساقط کیږي.
