څمکنیو کې د ۸۱ میلیونه افغانیو په ارزښت د نجونو یو ښوونځي ته نوې ودانۍ جوړېږي
د پوهنې وزارت، پکتیا: د پکتیا ولایت څمکنیو ولسوالۍ کې د سیمین اکبري د نجونو ښوونځي نوې ودانۍ د جوړېدو چارې د پوهنې ریاست د مسوولینو، قومي مشرانو او یو شمېر نورو چارواکو په ګډون پیل شوې.
یاده ودانۍ د ۸۱ میلیونو افغانیو په مجموعي لګښت د ښارجوړونې او د ځمکو وزارت لخوا په پاخه او اساسي ډول په دریو پوړونو کې جوړیږي، چې ۴۰ درسي ټولګي، ۹ اداري خونې، یوه معلوماتي خونه، د لمريزې برېښنا سيستم، د اوبو ذخيره، احاطوي دېوال، دېرش عصري تشنابونه، ګودام، کتابتون اونور اړینې آسانتیاوي به ولري.
د پوهنې رییس د سیمې خلکو ته په خبرو کې ډاډ ورکړ، چې د دې ولایت د نجونو زده کړو ته ځانګړې پاملرنه کوي او موخه یې داده، چې ټول ماشومان په مساوي ډول زده کړو ته لاسرسی ومومي.
پوهنې رئیس استاد کوچي ځاځي زیاته کړه چې د پوهنې له اړخه په ځانګړي ډول په ودانیزه برخه کې سږ کال بې ساری دی، هدف مو دا دی چې یو وخت په دې ولایت کې سل سلنه د ودانیو د کمښت ستونزه حل شي. نوموړي زیاته کړه: له تاسې ټولو مو هیله ده، چې د پوهنې له دې سپیڅلي کاروان سره مرسته وکړئ، زه له ټولو اړخونو مننه کوم چې په دې برخه کې له مونږ سره همکاري او مرسته کړې.
