د پوهنې وزارت سرپرستې د ننګرهار له والي سره ولیدل
د پوهنې وزارت، کابل: د پوهنې وزارت سرپرستې آغلې رنګینې حمیدي د ننګرهار له والي ښاغلي ضیاالحق امرخیل او د ننګرهار ولایت د پوهنې رییس ښاغلي حسیب الله شینواری سره په خپل کاري دفتر کې ولیدل.
په دغه لیدنه کې، د ننګرهار والي د پوهنې په برخه کې د اصلاحاتو، پرمختګ او د پوهنې ستونزو په ځانګړي ډول د درسي کتابونو کموالۍ، د ښوونځیو جوړول، د ښوونکو کمبود او یو شمیر نورو مسایلو خبرې وکړې.
د پوهنې وزارت سرپرستې آغلې رنګینې حمیدي په دغه ولایت کې د پوهنې په برخه کې د دوی د هڅو له امله د ننګرهار له والي څخه مننه وکړه او زیاته یې کړه: "د پوهنې وزارت په محرومو سیمو کې د پوهنې د ستونزو حلولو ته ځانګړې پاملرنه لري."
آغلې حمیدي څرکنده کړه: ښوونه او روزنه د هیواد د هر بچي حق دی او ټینګار یې وکړ د ښوونې او روزنې د ښې زمینې برابرول په تیره د نجونو لپاره په جدي توګه کار کوي او په دې لاره کې د خلکو، علماوو او محلي مسوولانو ملاتړ ته له مخکې نه زیات ضرورت دی.
په پای کې ښاغلي ضیاالحق امرخیل د پوهنې وزارت رهبري له پاملرنې او ژمنې څخه مننه وکړه او ژمنه یې وکړه چې په ټولو برخو کې په ځانګړي ډول د پوهنې په برخه کې د پوهنې وزارت سره همکارۍ ته چمتو دی.
