ننگرهار کې د یو ښوونځي د جوړېدو چارې پیل شوې
د پوهنې وزارت_ننګرهار: د ننګرهار ولایت د جلال اباد ښار نصرت لېسې د ودانۍ د بنسټ ډبره د نوموړي ولایت د پوهنې ریاست د مسوولینو لخوا کېښودل شوه.
د نصرت هلکانو په لېسه کې په جوړو شویو مراسمو کې چې پکې د پوهنې وزارت د ښوونیزې څارنې عمومي ریس او د پوهنې ریاست مشرتابه غړي هم حاضر وو د ننګرهار پوهنې ریس حسیب الله شینواري وویل د پوهنې ریاست په هڅو او وړاندیز او په جلال اباد کې د ملګرو ملتونو د کډوالو ادارې(UNHCR) په مالي مرسته د نصرت د هلکانو لېسې لپاره نوې ودانۍ جوړیږي . دپوهنې ریس وویل دا ودانۍ په پاخه او اساسي ډول په دوو پوړنو کې ۱۵۰ زره امریکایی ډالرو په لګښت د ۴ میاشتو په موده کې جوړیزي ، چې ۱۲ درسي ټولګي، ۴ اداري خونې او نور اړین ملحقات به ولري ، چې په جوړیدو سره به یې د نصرت د هلکانو لېسې د سرپنا ستونزه هواره شي. همدارنګه دپوهنې ریس د ملګرو ملتونو د کډوالې ادارې نه مننه وکړه چې په ۲۰۱۹ کال کې یې د پوهنې ریاست په وړاندیز دبهسودو ولسوالۍ د سراچي نجونولېسې او د احنف بن قیس لېسې لپاره نوې دوه پوړیزه ودانۍ او دتنګي دامان لېسې لپآره داحاطې دیوال، تشنابونه او څښاک اوبو چارې پېل کړې وې چې دبشپړیدو په حال کې دي او ډیر زر به ګټې اخیستنې ته وسپارل شي.
همدارنګه د بهسودو ولسوالۍ د سردار داود خان او نقیب احمد خپلواک او جلال اباد ښار د شهیدې انګیزې لېسې لپاره د نویو ودانیو جوړولو چارې به ژر پېل شي.
