کونړ ولایت کې د ۲،۱ مېلیون افغانیو په لګښت د یو ښوونځي نوې ودانۍ جوړه شوه
د کونړ ولایت پوهنې ریاست په خبرپاڼه کې راغلي، چې د یاد ولایت په خاص کونړ ولسوالۍ کې د لوټانو لومړني ښوونځي د نوې ودانۍ رغنیزې چارې بشپړې او د پوهنې رئیس مولوي محب الله حیدري، مسئولینو، قومي مشرانو او دیني علماوو په حضور کې ګټې اخیستنې ته وسپارل شوه.
د دغه ښوونځي مالي لګښت ۲ مېلیونه ۱۰۰ زره افغانۍ دی، چې د حداد فرهاد خیریه بنسټ د کلتوري مرکز له خوا ورکړل شوی دی.
د کونړ پوهنې رئیس او نورو ویناوالو په ټولنه کې د علم او پوهې په ګټو خبرې وکړې او د ښوونیزو بنسټونو جوړول یې یو له صدقه جاریه نېکو اعمالو څخه وبلل.
په ورته مهال، یوشمېر مشرانو او د سیمې خلکو د خپلو اولادونو ښوونې او روزنې په برخه کې ، د پوهنې وزارت د رهبرۍ له پاملرنې څخه خوښي څرګنده کړه او د یاد وزارت له پلانونو او پروګرامونو څخه یې خپل ملاتړ څرګند کړ.
