په کندوز ولایت کې د جنت باغ لومړني ښوونځي ودانۍ پرانیستل شوه
د کندوز ولایت په آقتاش ولسوالۍ کې د جنت باغ لومړني ښوونځي نوې ودانۍ د یاد ولایت د پوهنې رئیس مولوي حزب الله مبشر له لوري پرانیستل شوه. د ښوونځي دغه ودانۍ چې د پوهنې د ملاتړ بنسټ په مالي همکارۍ د څه باندې ۲۵ مېلیونه افغانیو په لګښت جوړه شوې، ۸ درسي ټولګي، ۲ درسي خونې، د مېزونو - څوکیو په ګډون ټول اړین توکي او یوه لابراتوار خونه لري. د پوهنې رئیس د همدغه ښوونځي د پرانیستې پر مهال وويل: هيله لرم چې د دغه ښوونځي په جوړېدو سره به ستاسو ماشومانو ته د زده کړو ډېرې آسانتياوې برابرې شي او له زده کوونکو او مسئولينو يې وغوښتل، ترڅو د ښوونځي د ودانۍ ساتنې ته جدي پاملرنه وکړي. د سيمې خلکو په خپله ولسوالۍ کې د ياد ښوونځي له جوړېدو خوښي څرګنده کړه او په سیمه کې يې د يادې ودانۍ د جوړېدو په برخه کې د پوهنې وزارت د مشرتابه هڅې وستايلې.
