په هلمند ولایت کې د ۱۷۲ مېلیونه افغانیو په لګښت د ۹ بابه ښوونځیو د جوړېدو چارې پیل شوې
د پوهنې وزارت مسئولین خبر ورکوي، چې د یو همکار بنسټ په ملاتړ به د هلمند ولایت په مارجې، ګرشک، باباجي، ناوې، خانشین، دیشو، بهرامچې، ګرمسیر او نهرسراج ولسوالیو کې یو - یو معیاري ښوونځی په پاخه او اساسي ډول جوړ کړي.
د يادو ښوونځيو د بنسټ ډبرې اېښودلو په مراسمو کې چې د همدې ولايت په مارجې ولسوالۍ کې جوړ شوي وو، د هلمند ولايت مقام د دفتر رئيس الحاج ملا عبدالرحمن حذيفه، د پوهنې رئيس الحاج مولوي محمد عوض انصاري او د سيمه ييزو ادارو يو شمېر مسئولينو ګډون درلود.
ويناوالو د ټولنې په اصلاح او د هېواد په پرمختګ کې د پوهنې پر ارزښت خبرې وکړې او له خلکو يې وغوښتل چې خپل ماشومان مدارسو او ښوونځيو ته د علومو د زده کړې لپاره واستوي.
له بلې خوا د سیمې خلکو هم په هېواد کې د ښوونیزو بنسټونو د پراختیا په ځانګړي ډول د هېواد په محرومو سیمو کې د پوهنې وزارت د هڅو ستاینه وکړه.
